Bænarefni ekki aðhlátursefni

Þessi vesalings maður gengur greinilega ekki heill til skógar. Ég vona hann að finnist sem fyrst áður en hann deyr af völdum ofkælingar.

Enginn með réttu ráði gerir svona lagað, og þess vegna er bæn mín sú að hann sé heill og fái rétta meðhöndlun er hann kemur til baka í hlýjuna.

Þeir sem hafa séð (ó)sóma sinn í að fara með flymtan og spé yfir þessu atviki, ættu að setja skottið á milli fótanna á sér og skammast sín!

Guð blessi björgunarfólkið er leitar að honum, því enn er hann ófundinn.

 

Allsnakinn á Esjunni í 600 metra hæð

Í dag er fyrirbænardagurinn

Ég sá þetta auglýst hjá honum Þórarni bloggvini mínum og félaga, og mátti til með að auglýsa jafn þarfan hlut, hann útskýrir tilgang þessa fyrirbænardags mjög vel á blogginu sínu, og er óþarfi fyrir mig að endurtaka það, nánar hér.

Notum nú tækifærið og biðjum fyrir náunga okkar og nágranna, sama hver hann/hún er og hvaða trú viðkomandi aðhyllist. Ef ekki fyrir okkur sjálf heldur samfélagsins vegna, því eins og ástandið hefur verið undanfarið er ekki vanþörf á þessu góða átaki.

En af mér er það að frétta að ég loksins búinn í sumarfríi og kominn aftur í vinnu. Ég hef ekki bloggað undanfarið einfaldlega vegna þess að ég vildi eiga mér smá líf í sumarfríinu, því oft þegar ég geri færslur þá þarf mikla vinnu og orku til þess að sinna þeim. En mikið var þetta kærkomið frí, og er ég nýr maður eftir þetta allt! Mér tókst meira að segja að brenna af mér vömbina og er orðinn aftur eins og ég var hérna í gamla daga. Það er miklum göngum, hjólreiðum og sundi að þakka! Rúm 10 kíló eru fokinn og líður mér miklu betur fyrir vikið, og reyndar lít betur út. 

Undirskriftarsöfnun til stuðnings Ásmundi Jóhannssonar

Það kom einhver sem kallar sig "Aðdánandi Ásmundar" í síðustu grein minni og spurði af hverju væri ekki undirskriftarlisti til stuðnings Ásmundar. Ég varð við þessa frábæru hugmynd hans og stofnaði slíkan lista sjálfur.

Undirskriftarlistann er að finna hér: 

http://www.petitiononline.com/mod_perl/signed.cgi?asmundur
 

Ég mun svo tala við nokkra þingmenn sem munu vonandi aðstoða mig við koma þessu til réttra aðila og hvernig ég stend að því.

En ég hvet alla til þess að skrifa undir og mótmæla mesta óréttlæti íslandssögunnar, því ekki viljum við sjá Ásmund fara í steinin ... eða hvað? 

Ég tók eftir að ekki allir vafrar styðja íslenska stafi, þess vegna birti ég þennan texta sem er inná undirskriftarsöfnunni fyrir þá sem lenda í því, þetta er erlend síða sem ræður afar illa við íslenska stafi:

Með undirskrift minni lýsi ég undirrit-uð (aður)yfir stuðningi við framlag
Ásmundar Jóhannssonar gegn kvótakerfinu.  Íslensk stjórnvöld höfðu skuldbundið
sig til að hlíta úrskurði Mannréttindanefndarinnar. Í stað þess að gera það
brjóta þau mannréttindi á öldnum sjómanni, því viljum við jafnframt mótmæla. 

Ég hvet alla landsmenn til þess að taka þátt í þessu, sama hvaða flokk þið tiheyrið. 

Með Guðs hjálp og ykkar getum við forðað Ásmundi frá harkalegum aðgerðum stjórnvalda!

Bátur á ólöglegum veiðum

Rær fyrir réttlætinu!

Ég tek ofan fyrir hvunndagshetjunni Ásmundi Jóhannssyni, hann gefur stjórnvöldum langt nef svo um munar gegn kvótakerfinu. Það sem er skýrt mannréttindabrot að mati erlendra dómstóla, á hann kannski eftir að sitja inni fyrir. Sem væri auðvitað þvílík þversögn að hálfa væri nóg.

Ég tók eftir að góðvinur minn og ásatrúarmaður Sigurður Þórðarson samdi soldið skemmtilega sjóferðarbæn að hætti ásatrúarmanns fyrir Ásmund, hér er mótleikur minn við því:

Sjóferðabæn:

"Ég heiti á Drottinn allsherjar að fylgja nú þeim góða dreng Ásmundi Jóhannssyni í þennan róður, hann megi afla vel og kraftur þeirra megni að kvótakerfið leggist af, svo hjálpi mér Drottinn Guð minn allsherjar".

Guð blessi þessa hetju sem berst fyrir réttindum okkar allra. Og sem suðurnesjamaður, verð hreykinn að sjá svona hetju að verki!

 

Mótmælir kvótakerfinu með veiðum

Ritstífla .. íslensk náttúra og fleira ...

Ég hef reyndar verið í sumarfríi og notið þess að vera innan um yndislega náttúru Íslands. Við erum nýkominn að norðan við hjónin og ferðuðumst þar víða. Ég er nýbúinn að uppgötva nýtt áhugamál sem tengist öllu sem við kemur íslenskum jurtum.

Hér áður fyrr lagði ég það í vana minn að kalla öll blóm "Fjólur" til þess eins að þurfa ekki að læra nöfnin á þeim, en nú er dagurinn annar, ég er meira að segja búinn að vera kynna mér hinar og þessar sem eru bæði notaðar til lækninga sem og matselda. Vallhumall er ein slík jurt, ég bruggaði úr því te sem og olíu sem má nota til þess að bera til dæmis á lúna fætur. Teið er afar hreinsandi og skilar útúr líkamanum alls kyns óhreinindi. 

Blóðberg (Thymian) höfum við mikið týnt, núna er einmitt rétti tíminn til þess að krækja sér í það. Enda er blóðberg algjört eðal með lambakjöti! 

Ég fór í dagsferð ásamt tengdaföður mínum uppí Naustaborgir sem eru við kjarnaskóg í Eyjafirði. Þar tókum við hjónin alls kyns sýni af alls konur jurtum sem heita ekki lengur fjólur! Góða sveppi var þar einnig að finna og mun ég nýta þá í einhvern góðan rétt ... ég veit bara ekki hvað ennþá. 

Íslendingar finnst mér ekki nógu duglegir að nýta það sem til er útí Guðs grænni náttúrunni, og er hægt að finna fjöldann allan af jurtum sem má nýta okkur bæði til átu og til yndisauka. 

En ég vil þakka öllum þeim sem hafa gert athugasemdir hjá mér á meðan ég var fjarverandi, en ég er ennþá í fríi og ætla að njóta sumarsins í þessari yndislegu íslensku náttúru sem Guð skóp handa okkur, með öllum sínum jurtum og fjólum! Og jú er loks læknaður af heiftarlegri ritstíflu sem hefur hrjáð mig undanfarið, Guð svarar bænum - svo mikið er víst!

Ég læt litla myndasýningu fylgja, okkur tókst nefnilega loksins að læra á þessa forláta myndavél sem við eigum eru hér nokkrar myndir sem ég tók:

Fyrst er það Sírena:

Svo er það Sóley:

Hér ber að líta Jakobsfífil:

Allar þessar myndir voru teknar um miðja nótt í Kjarnaskógi.  Njótið vel.

Ómanneskjulegt!

Þessi Paul Ramses, sem hefur starfað með hjálparstofnunum að byggja upp starf í Kenía, á ekki að fara úr landi! Eða réttara sagt hent úr landi! Nú fyrst Amnesty International bendir á þá aðstöðu sem býðst á Ítalíu, sem er varla skeppnum hæfandi, þarf að grípa til einhverrra ráða! Hann á nýfætt barn og eiginkonu sem mér finnst rangt að gera að munaðarleysingjum! 

Birgitta Jónsdóttir hefur hvatt fólk til þess að mótmæla þessu óréttlæti! Ég hvet fólk eindregið til þess að mæta!

Birgitta ritar:

Á morgunn 4. júlí á milli 12 og 13 verða mótmæli fyrir utan dómsmálaráðuneytið. Við skorum á Björn Bjarnason og Hauk Guðmundsson að snúa Paul Ramses heim og fjalla um mál hans hérlendis þar sem fjölskylda hans er. Við krefjumst þess að Paul fái hér pólitískt hæli og að vinnubrögð  eins og í máli hans muni ekki endurtaka sig.

Látum nú verkin tala! Og bendi ég hér með á undirskriftarlista sem Birgitta útbjó.

Amnesty fer fram á að stjórnvöld endurskoði ákvörðun sínap

Svona gera menn ekki!

"Tilvera okkar er undarlegt ferðalag. Við erum gestir og hótel okkar er jörðin" orti Reykjavíkurskáldið Tómas Guðmundsson. Og eiga hans orð vel við þessa undarlegu frétt, því við erum einmitt gestir á þessari jörð, og hvað vitum við hvað tekur við eftir að líf okkar slokknar. Ég er nokkuð viss í minni sök, en ég er ekki viss um ykkur.  ;)

Ritað er:

Fyrsta bók Móse 2:7
Þá myndaði Drottinn Guð manninn af leiri jarðar og blés lífsanda í nasir hans, og þannig varð maðurinn lifandi sál.

Þannig var maðurinn skapaður í upphafi, eða andi líkami og sál.

Síðan talar Faðirinn af hinum og segir um son sinn Jesú:

Matteusarguðspjall 12:18
Sjá þjón minn, sem ég hef útvalið, minn elskaða, sem sál mín hefur þóknun á. Ég mun láta anda minn koma yfir hann, og hann mun boða þjóðunum rétt.

Sálin, er lífið sjálft sem Guð gaf okkur. Við værum ekki lifandi menn án hennar. Þess vegna er ver og miður ef nútímasamfélagið er orðið svo guðlaust að selja sálu sína til einhvers pizzufyrirtækis! Þessi gjörning sýnir hversu margt hefur breyst á örfáum árum, útbreidd viðhorf eins og ég er að bera fram núna, eru gleymd og grafinn. Guðleysi sem og einlægt áhugaleysi á Guði hefur gert það að verkum að sálin er orðinn ómerkilegur hlutur.

Matteusarguðspjall 12:18
Sjá þjón minn, sem ég hef útvalið, minn elskaða, sem sál mín hefur þóknun á. Ég mun láta anda minn koma yfir hann, og hann mun boða þjóðunum rétt.

Boðskapurinn er greinilega gleymdur og eftir situr að hringja í Dominos og selja sálu sína fyrir eina pizzu! Eins sorglegt og þetta er má einnig spyrja; Er kristni á undanhaldi? Ég held ekki. Samkvæmt könnun frá breska fyrirtækinu "Encyclopædia Britannica" frá árinu 2005 eru allt aðrar niðurstöðurog eru þær er virðast á heimsvísu. Margir hafa nefnilega haldið því fram að Íslam sé stærra, en svo er greinilega ekki.

Þessi mynd sem ég var að ljúka við í Excel sýnir niðurstöður þessarar könnunar:

 

 

Sem þýðir aðeins, að kristni er kominn til þess að vera!  Og vona ég að menn hætti að selja sálu sína pizzufyrirtækjum!

Fékk 300 þús. fyrir sálina sína

Ég hlakka til !

Ég er einn af þeim sem mun fara á þessa tónleika annað kvöld, Gústi mágur áskotnaðist miðar á þennan stórviðburð og er ég honum ævinlega þakklátur fyrir að taka mig með ... ókeypis! Að mínu mati er þetta stórviðburður í tónlistarheiminum á Íslandi að frátöldum tónleikum 'Metallicu' sem haldinn var hér um daganna.

En bara svo það sé á hreinu þá er ég mesti auli sem þú finnur hvað viðkemur tónlistarþekkingu,  þetta geta þeir sem þekkja mig staðfest, sem kannski útskýrir af hverju ég varð svona hrifinn af lögum eins og "The Sounds of Silence"  ...   því ég eyddi mest öllum mínum tíma í æsku að dútla við að teikna og kunni hvað best við þögnina. (Ég var guðdómlega leiðinlegt barn!)

Auðvitað kom fyrir að maður hlustaði á tónlist, ástandið var nú ekki svo slæmt, og voru það væmnir hlutir eins og þeir félagar Simon og Garfunkle sem urðu fyrir valinu. Á unglingsárum gerðist ég reyndar mikill aðdáandi Metallicu, sem og Radiohead, Doors, Pink Floyd og Led Zepplin. Mikið vatn hefur runnið til sjávar síðan þá, og eftir að ég tók trú eru Michael W. Smith og Glenn Kaiser í miklu uppáhaldi hjá mér.

Af "heimsins" tónlist hlusta ég aðallega á klassík núorðið. Ég veit ekki hvað er að gerast, mikið hefur maður meyrnað með aldrinum, ég sæki alltaf í væmnari og væmnari hluti! Því ég hlusta einnig á Paul Simon, og hef ennþá gaman að. Mér finnst þeir stundum á köflum svo rómantískir...

Í tilefni þessara tónleika fann ég eldgamla upptöku með: "The Sounds of Silence", sem sunginn er af þeim félögum þegar allt lék í lyndi:

Njótið vel og Guð blessi ykkur!

Paul Simon með tónleika á morgun

Við þurfum að finna hinn gullna meðalveg!

Hvað er þá rétt ritskoðunarstefna? Sjálfur hef legið undir ámæli frá trúsystkinum mínum að vera alltof linur í þessum efnum. Ég leyfi öllum að tjá sig sama hver það er, og hefur það stundum farið útí öfgar þessi frjálslynda stefna hjá mér.

Sumir trúbræður mínir hafa skammað mig fyrir að leyfa trúleysingjum og öðrum að hertaka umræðurnar, og skil ég vel sjónarmið þeirra, en mér finnst betra að leyfa orðum þeirra að standa og leyfa öðrum að dæma sjálft hver er með öfgar.

Það er ekki á dagskrá að breyta þessari stefnu, en ég vísa samt í höfundarsíðuna þar sem ákveðnir skilmálar eru og mun ég reyna að fylgja eftir bestu samvisku. Því það sem ég er að reyna að breyta í mínum veika mætti er það mannorð sem kristnir hafa skapað sér, við erum mörg hver úthrópuð "ritskoðarar" og sögð "hefta málfrelsi". Ég er ekki sammála trúsystkinum mínum í ritskoðunarstefnu sumra þeirra, en það er bara ég.

En reyndar verð ég að viðurkenna að ég er með tvo aðila í banni. En það er vegna þess að innlegg annars þeirra voru hreint og beint svívirðileg, og hinn hafði ég engan húmor fyrir, enda kallaði hann sig Jesú Krist, ég kæri mig ekki um slíka kjána í mínum húsum!

Því hvað er blogg annað hús manns? Ef einhver kemur inn og hefur hægðir í anddyrinu hjá þér, ertu viss um að þú viljir þann aðila aftur í heimsókn? Nei. Svo mikið er víst. Það gildir um þá sem slíkt gjöra og taki þeir það til sín sem eiga það skilið.

En ekki líst mér á þessar reglur í fréttinni, og ef eftir þeim verður farið þá á mikið eftir að breytast. En eins og bent er réttilega á í fréttinni er einungis talað um vandamálið og engar lausnir. Þess vegna skulum við halda vatni yfir þessum tíðindum og taka þeim með fyrirvara. Þess vegna verðum við að setja okkur eigin siðferðisreglur og reyna hvað best að fara eftir þeim.

Vilja setja hömlur á bloggara

Kraftaverkin gerast ennþá í dag!

Hver segir að bænir okkar virki ekki, Guð er ekki heyrnarskertur né handleggjalaus!

Ég er svo ánægður og glaður yfir vissum tíðindum nú í morgun að get ekki orða bundist! Málið er að
kona mín fór með dóttur okkar sem hefur þjáðst af vírusi í vinstra auga hennar. Hún hef verið að nota allskynskrem og dropa til þess að sporna við að vírusinn skaði sjón hennar meira en orðið er, en hún var með 25% sjón á vinstra auga.

Eftir margar bænir leiðir Guð okkur til læknis sem setur hana á aðra dropa og einhverjar töflur sem eiga að bæta hornhimnu hennar. Nú í dag 3 mánuðum eftir þennan lyfjakúr, þá mældist dóttir mín með 50% sjón á vinstra auga, og eru líkur til þess að þetta batni ennþá meir ef meðferðin heldur áfram!

Ég er þakklátur Guði mínum, hann gaf okkur hin stórkostlegu læknavísindi og bænheyrði áhyggjufulla foreldranna, þ.e.a.s. mig og eiginkonu mína.

Ritað er:

Matteusarguðspjall 7:7
Biðjið, og yður mun gefast, leitið, og þér munuð finna, knýið á, og fyrir yður mun upp lokið verða.

Svo sannarlega stendur Guð við sitt! 

P.s. ég var að taka eftir því að ritstjórn blog.is var að setja mig á forsíðu blog.is, og hafa þær innilegar þakkir fyrir það! Önnur bænheyrslan í dag ... hvað kemur næst!