Rabbabaraís

Bryndís kona mín bakaði snilldar eplapæ um helgina, sem hún segir frá bloggi sínu. Ég tók mig til og gerði soldið sérkennilegan ís með herlegheitunum. Eins furðulega og það hljómar þá gerði ég rabbabaraís, og birti ég þessa uppskrift til þess að fullkomna uppskrift eiginkonu minnar.

Rabbabaraís

Hráefni:
3 eggjarauður
80 grömm sykur
1 peli rjómi
1 líter af Nýmjólk
1 stk. Vanillubaun
Rabbabari nokkur stk.

Aðferð:

Hrærið eggjarauður og sykur saman þar til það er orðið létt og fölt. Kljúfið vanillubaun og látið fræin útí. Blandið svo rólega saman mjólk og rjóma á meðan hrært er. Skerið rabbabarann smátt niður og setjið útí. Setjið svo allt í ísvél eða frysti, ef ísvél er notuð er ísinn tilbúinn eftir 30 mín eða svo. Ef þetta er sett í frysti verður að hræra í þessu með gafli á minnst klukkutíma fresti í ca. 4 tíma. Þá myndast ekki kristallar og verður ísinn silkimjúkur.

Verði ykkur að góðu. 

Kærleiksmaðurinn Hjalti Rúnar

Ég er alveg upp með mér, hin hjartgóði og fyrirmynd kærleikans sem og meðlimur Vantrúar, Hjalti Rúnar Ómarsson, hefur enn og aftur skrifað grein um mig. Það mun vera sú fjórða í röðinni.

Síðan ég byrjaði að blogga hér á blog.is þá hef ég greinilega verið í einhverju uppáhaldi hjá þessum ágæta vantrúarmanni, hann sér tilefni til þess að gera mál úr orðum mínum hvað eftir annað, og veitir mér um leið ókeypis kærkomna auglýsingu. Takk Hjalti!

Förum aðeins yfir sögu okkar Hjalta:

Fyrsta færslan sem hann skrifar um mig heitir:  Trúvarnarmaðurinn Guðsteinn

Númer tvö í röðinni heitir:  Myndræn uppsetning mótsagnar

Númer þrjú í seríunni heitir:  Kristilegur kærleikur

Svo númer fjögur og svo nýjasta heitir:  Er nánd fjarlæg eða nálæg?

Í síðustu grein þessa mikla "scribe" Vantrúar, þá gerir Hjalti grín af orðum mínum þar sem ég vil ekki bekkenna að nánd getur þýtt: "í náinni framtíð". Ég sagði nefnilega:

"í nánd" er í mínum huga hvenær sem er, í náinni framtíð eða jafnvel fjarlægri.

Og fer ég ekki ofan af þeim orðum. Því eins og við finnum í þjóðsöng okkar Íslendinga:

Fyrir þér er einn dagur sem þúsund ár
og þúsund ár dagur, ei meir: 

Nákvæmlega þetta var ég að meina, tíminn er afstæður hjá Guði og hef ég reyndar ekki hugmynd um hvernig hann reiknar árin, og er það ekki mitt að vita. Þess vegna þegar ég segi til dæmis: "Er heimsendir í nánd?" og svo spurður hvað "í nánd" er mínum huga. Þá er svarið í þjóðsöngnum og ber að líta hér ofar. Einnig er ritað:

Markúsarguðspjall 13:33
Verið varir um yður, vakið! Þér vitið ekki, nær tíminn er kominn.

Einmitt, það er einmitt málið. Við vitum ekki hvenær tíminn kemur og ekki okkar að vita. Því það stendur einnig:

Mattheusarguðspjall 24:36
En þann dag og stund veit enginn, hvorki englar á himnum né sonurinn, enginn nema faðirinn einn.

Þess vegna þegar ég segi "Er heimsendir í nánd" er það doldið afstætt og samkvæmt ofangreindu. Ekki flókið það. En aðrir sjá ásæðu til þess að benda á annað og vera með stórskemmtilega útúrsnúninga!

En ég vil þakka þessum mikla öðling fyrir að þykja svona vænt um mig, einnig vil ég þakka honum að auglýsa blogg mitt enn frekar og vona ég að ég hafi endurgoldið honum greiðann!

Bænheyrsla !

Herforingjastjórnin í Búrma hefur loks látið af drambi sínu og hleypt hjálparstarfsmönnum inn. Veit ég vel að þetta hefur verið bænarefni víðs vegar um hin kristna heim að þetta loks leysist.

Og hver segir að bænin virki ekki?

Búrma þiggur alla aðstoð

Nokkur fyrirbænarefni ...

Ég vil biðja fyrir ...

... veikindum móður minnar, sem ennþá hefur ekki komið í ljós hvað er. En alvarlegt er það.

... eiginkonu minni og fjölskyldu, og að Guð verndi þau og blessi á meðan ég vinn svona mikið.

... veikindum besta vinar míns, og að hann megi ná fullum bata eftir áralanga barráttu.

... veikindum bestu vinkonu okkar hjónanna, Guð þekkir það.

... eigin heilsu og ég nái fullum bata í bakinu sem og þetta ónýta hné mitt.

... þeim fjölmörgu fjölskyldum í Kína, sem misst hafa ástvini.

... að fólk átti sig að trúin er ekki svo slæm, heldur stórkostleg.

... ég vil biðja fyrir að menn hætti að eyða börnum með downseinkenni.

... ég vil biðja fyrir frjálsri Tíbet.

... ég vil biðja fyrir Íslendingum öllum og Guð blessi okkur og varðveiti.


Í auðmýkt og með þungt hjarta ber ég fram þessi bænarefni, og vona ég að ræfill eins og ég geti gert eitthvað gagn í Guðsríki. Ég hef reynt eftir fremsta megni að koma fram eins og ég er klæddur og vona ég að það hafi breytt einhverju.

Undanfarið hefur mér fundist ég var gagnlaus í Guðsríki, en þakklátur er ég að vera svo heppinn að eiga trúsystkini sem standa við bakið á mér. Eftir MJÖG annasama helgi þá kom ég úrvinda á samkomu í kirkju mína. Þar var mér afar vel tekið, og stend ég í þakkarskuld við minn yndislega prest og söfnuð. Brotinn var ég en ekki lengur, þökk sé lifandi Guði.

Guð blessi ykkur öll!

Eru þetta umhverfismálaöfgar?

Nei ég bara spyr, eins og þetta er góð hugmynd þá hef ég efasemdir um að stelpur fari að ganga í svona löguðu ... eða hvað stelpur?

Sólarorkubrjóstahaldari

Af hverju ætti ég þá að mæta á Austurvöll?

Mér þykir fremur óljóst af hverju ég ætti að mæta til einhverra mótmæla sem ég skil ekki alveg hverju nákvæmlega er verið að mótmæla. PDF skjalið sem var tengt við fréttina var fremur ... furðulega framsett og mjög óljóst hver tilgangurinn er bak við þessa yfirlýsingu.

Ég sé heldur ekki betur en þetta skjal þeirra sé komið beint frá bloggi Sturlu yfirtrukkara.  Og mætti hann koma því betur á framfæri hverju er verið ná fram með þessu. Eða er þetta jafn vel skipulagt og þegar krakkarnir stífluðu miklubrautina um daginn og voru að mótmæla bara til að mótmæla!   ;)

Hvaða breytingar hefur þetta í för með sér ef árangur ber?

• Er verið að mótmæla ríkisstjórninni almennt?
• Eða háu bensínverði?
• Kjörum atvinnubílstjóra? 
• Hverju ???

Í mómælayfirlýsingunni stendur:

En núna rúmum þremur árum seinna fórum við á fund Árna Mathiesen,
núverandi fjármálaráðherra og hans manna. Okkur til skemmtunar sáum við
Geir aftur en á mynd uppá vegg og hvað? Tóm blöð í nýjum stílabókum, er þetta
heilbrigð stjórnsýsla? Ekki einn punktur um fyrri fundi okkar þarna. Og hvað?
Það á að skoða málið.

Sorrý, en ég skil varla þessa málsgrein. Hvað er verið að reyna að segja þarna? Myndir af Geir og stílabækur ... ég bara skil þetta ekki. Það er ekki nóg að segja "afþví bara" og "Geir er stílabókarlaus vondur karl"! Af hverju á ég þá að koma? Og hverju er nákvæmlega verið að ná fram?

Þetta heldur áfram:

Svona framkoma er óásættanleg og ekki lítilli þjóð sæmandi. Á sama tíma og
við reynum að ná eyrum forsætis og utanríkisráðherra sem eru jú yfirmenn
þessarar stjórnar, eru þeir á þvílíkum ferðalögum að Sigmund í mogganum sér
sig knúinn til að bjóða þeim í opinbera heimsókn til föðurlandsins.

Já ... en hvaða framkoma? Það kemur mjög óljóst fram. Ég get tekið undir óþarfa ferðalög þessara ráðamanna, en þetta þarf að skýra betur.

Og meira stendur þarna:

Hvað eru þau að gera? Geir út um allan heim að segja þeim sem nenna að hlusta
að allt sé í góðu á Íslandi, reynandi að skrapa saman peninga til að bjarga
bönkunum. Ingibjörg á fullu í kosningaslag til öryggisráðs Sameinuðu Þjóðanna.
Hvað er að? Við erum með heimilislaust, pissublautt fólk á tröppum
fjármálaráðuneytisins. Er fólk haldið raunveruleikaflótta?

Jú þetta get ég samþykkt, þ.e.a.s. að ríkisstjórnin séu hræsnarar sem eyða og eyða í óþarfa, og um leið predika að þjóðin þurfi að herða sultarólina. Ég sakna samt stefnu atvinnubílstjóra, og hvernig kröfur atvinnubílstjóra koma þjóðinni í heild til góða( ? ) Það er ekki nóg að væla útí horni og segja allt til foráttu og segja svo ekki nákvæmlega af hverju.

Hver er stefnan? Og vantar allt kjöt á þessa óljósu yfirlýsingu!

Ég skal glaður mæta og sýna stuðning ef ég fæ þessi atriði á hreint, því ég skil bara ekki meininguna ... en það er bara ég.

Góðar stundir. 

Boða fólk á Austurvöll til að mótmæla

Til hamingju Siðmennt ...

Ég veit að þetta kemur úr hörðustu átt, en ég vil óska Siðmenntarfólki til hamingju með þetta. Þau eins og við búa við trúfrelsi, og hafa þau sama rétt og aðrir trúarhópar að stunda sínar athafnir.

Eina sem mér fannst skondið við þetta var að þetta var haldið í bænahúsi ... tíhí.. sem er afar gott kristilegt húsnæði undir þennan gjörning. 

Fyrsta útförin á vegum Siðmenntar

Góð fyrirmynd en hvað gerum við?

Gott hjá Svíum! En hvað gera íslendingar í þessum málum? Getur einhver frætt mig um það? En það er greinilegt að það er von í öllu þessu og er heimsendir greinilega ekki á næsta leyti eins og margir töldu mig segja í seinustu grein. 

 

Svíar skera upp herör gegn barnaklámi

Er heimsendir í nánd?

Um leið og ég ber Kínversku þjóðinni innilegar samúðarkveðjur í þessum hörmungum, þá vil ég benda á örfá athyglisverð atriði í þessu samhengi.

Ritað er:  

Matt: 24:3-8

3 Þá er hann sat á Olíufjallinu, gengu lærisveinarnir til hans og spurðu hann einslega: "Seg þú oss, hvenær verður þetta? Og hvert mun tákn komu þinnar og endaloka veraldar?"

4 Jesús svaraði þeim: "Varist að láta nokkurn leiða yður í villu. 5 Margir munu koma í mínu nafni og segja: ,Ég er Kristur!' og marga munu þeir leiða í villu. 6 Þér munuð spyrja hernað og ófriðartíðindi. Gætið þess, að skelfast ekki. Þetta á að verða, en endirinn er ekki þar með kominn. 7 Þjóð mun rísa gegn þjóð og ríki gegn ríki, þá verður hungur og landskjálftar á ýmsum stöðum. 8 Allt þetta er upphaf fæðingarhríðanna. 

Skoðum bara hvað er að gerast í kring um okkur: 

Myrtur á Oxfordstræti um miðjan dag

Barnslík fundust í kassa á Englandi

Drykkjarvatn til Barcelona

1,5 milljón manna í hættu

Meintur barnaníðingur handtekinn

Fritzl: „Vissi að þetta var rangt af mér“

Nauðgað á götu í Danmörku

Stór hluti Búrma undir vatni

Átta ára stúlku veittur lögskilnaður

Aldrei fleiri vændismál

Setti belti á bjórkassann en ekki barnið

Ofangreint eru bara örfá atriði af fjölmörgum sem mætti telja upp. En þarna stendur þetta allt saman svart á hvítu og tala staðreyndirnar sínu máli.  Anna Karen bar þessar pælingar fram á vísisspjallinu, og eru þetta bara pælingar og ekki einhver heimsendisdómur!

Sjáum þá hvar við stöndum og athugum þennan tékklista:

1. Hatur að aukast - X
2. Falsspámenn - X
3. Lögleysi að magnast - X
4. Hungur og þorsti yfirvofandi um alla jörð - X
5. Fréttir að landskjálftum - X
6. Mikið um ófriðartíðindi og þjóð að rísa gegn þjóð - X

Ég tek fram að ég er ekki að spá heimsendi, heldur eru þetta aðeins pælingar um hvar ert þú staddur/stödd þegar Jesús kemur? Spyr sá sem ekki veit.

10 þúsund látnir í Kína

Kristilegur liðsauki ...

Kristnum hefur borist afar góður liðsauki á bloggið. Það er hún Halldóra Ásgeirsdóttir og er flottur bloggari, hún er í sama söfnuði og ég.

Hún sýnir þá djörfung að skammast sín ekki fyrir trú sína ásamt þeim örfáu kristnu bloggurum sem í bloggheimum eru. Það sem ég á við er að kristnir mættu vera duglegri að sýna andlit sitt og staðfesta fyrir fólki að við erum ennþá til, og erum ekki endilega þessir "ofstækissinnar" sem margir telja okkur vera.

Ég sendi hér með út áskorinn til kristinna og bið fyrir því að vakning verði meðal okkar!