Opið bréf til Jóns Gnarrs og besta flokksins til varnar náttúrugalleríinu á Laugarnesi

Ég vil byrja á því að óska ykkur í Besta Flokknum innilega til hamingju með sögulegan sigur. Þótt ég hafi ekki kosið ykkur vil ég bera fram eina spurningu til ykkar sem myndi gera borgina „skemmtilegri“ eins og þið hafið lofað borgarbúum.

Það er varðandi Hrafnshreiðrið, eða réttara sagt náttúrugalleríið á Laugarnesi. Hver er afstaða ykkar til þess máls? Ætlið þið að beita jafn miklu offorsi og fráfarandi borgarstjórn? Eða ætlið þið að standa við orð ykkar og gera Reykjavík skemmtilegri?

Heimili Hrafns er hrein upplifun að heimsækja, og er hann sjálfur mjög opinn fyrir því að leyfa ferðafólki að skoða staðinn ef vilji ykkar er fyrir hendi. Ég bendi á að það er ódýrara að nýta heimili Hrafns til þess að auka tekjur Reykjavíkur og gera hana að aðlaðandi en með ísbirni. Hrafn hefur nefnilega margt fram að færa, til að mynda leikmunina sem hann hefur notað í myndum sínum í gegnum árin, eins er húsið sjálft með sína sögu, og hefur gjörbreytt ásýnd þess síðan það var bara kofi. Meira má fræðast um það hér.

Miklir fordómar hafa fylgt Hrafni í gegnum árin en votta ég það, sem persónulegur og góður vinur hans að þeir fordómar eru ekki rökum reistir. Um er að ræða algert ljúfmenni sem vill engum illt, og er hann traustur og góður vinur sem hefur reynst mér afar vel í gegnum árin. Hann er jú einstakur á sinn hátt, og sérvitringur mikill. Hvað með það að hann sé vinur Davíðs, það gerir hann ekki ábyrgan fyrir hruninu.

En við megum ekki vera hrædd við hluti eða menn sem eru öðruvísi, því eins og vinskapur okkar Hrafns sannar, þá tekur hann mér eins og ég er, þrátt fyrir trúarafstöðu mína og er hann ekki haldinn neinum fordómum gagnvart afstöðu minni sem margir á Íslandi mættu taka til fyrirmyndar, og hef ég sjálfur lært heilmikið af honum í þeim efnum.

Látum ekki kerfiskarla og embættismenn eyðileggja þessa náttúruperlu sem Laugarnesið er, og kalla ég eftir viðbrögðum ykkar, því það eru ekki embættismennirnir sem fylgja reglum eftir bókstafnum sem stjórna borginni. Það eruð þið kjörnir fulltrúar okkar sem farið með það vald. En nú er spurningin hvernig þið nýtið það vald? Og kalla ég eftir viðbrögðum einhverra réttkjörinna fulltrúa Bestaflokksins í þessu máli sem hefur kjark og þor að taka afstöðu til listarinnar sem á sér stað hjá leikstjóranum Hrafni Gunnlaugssyni.

Stofnaður hefur verið stuðningshópur til varnarnáttúrugallerísins á Laugarnesi á snjáldurskinnu, eða 'Facebook', og hvet ég alla þá sem hafa kjark til þess að standa með listinni að gerast stuðningsfólk.

Eins hef ég sett inn viðtal sem Kolbrún Bergþórsdóttir tók við Hrafn 23. maí síðast liðinn sem .pdf skjal við þessa færslu, og geta menn lesið sig til um hver hans upplifun og afstaða er í þessu máli og gert það upp við sig sjálft hver afstaða hvers og eins er.

Góðar stundir og þakka ég lesturinn. Lengi lifi listinn og frelsið fyrir listamenn og konur að tjá sig!

Skrár tengdar þessari bloggfærslu:

• Viðtal við Hrafn, birtist í Morgunblaðinu maí 2010

Athugasemdir

[Grefillinn Sjálfur - Koma svo! (IP-tala skráð) 9.6.2010 kl. 22:27]

Ég sé að ég verð að fara að drífa mig þarna niðureftir og sjá þetta með eigin augum. Öðruvísi getur maður vart verið dómbær.

[Guðsteinn Haukur Barkarson, 9.6.2010 kl. 22:33]

Hrafn tekur vel á móti þér kæri Grefill, því get ég lofað. 

[Árni Gunnarsson, 9.6.2010 kl. 23:38]

Hrafn er skemmtilegur furðufugl og á að vera alfriðaður með sitt skrýtna umhverfi sem er svo sannarlega ekki fyrir neinum.

Það væri ein skelfilega nauðgunin í viðbót við margar hörmulegar sem borgarskipulagið hefur framkvæmt ef Hrafn yrði hrakinn burt og farið að skipuleggja "byggðasvæði fyrir hagvöxtinn" á Laugarnesinu.

Er þetta ekki eina friðaða svæðið fyrir huldufólk og álfa í Reykjavík?

Það á að bjóða Hrafni að vera undarlegi maðurinn í Laugarnesinu.

Það yrði borginni til sóma.

[Guðsteinn Haukur Barkarson, 9.6.2010 kl. 23:43]

Vel mælt Árni og er ég þér sammála.

[AE (IP-tala skráð) 10.6.2010 kl. 01:57]

Tek það fram að þekki ekki Hrafn persónulega, né hef ég verið verið neinn sérstakur aðdáandi verka hans í gegnum tíðina (fundist sum góð, önnur ekkert sérstök). 

En sumarið 2007 var ég þess heiðurs aðnjótandi að sækja hann alveg óvænt heim.  Þetta var yndislegur íslenskur sumardagur, vinahópurinn hittist í hádegismat á Laugarnesveginum og ákváðum svo að rölta saman eftir strandlengjunni niður í bæ.  Leiðin lá fram hjá híbýlum Hrafns og þar sem "hefðbundnir óframfærnir Íslendingar" á ferð þá ætluðum við bara að skunda þar framhjá.  En vinkona okkar sem bjó þarna í hverfinu hafði áður notið gestrisni Hrafns og hvatti okkur að til að skoða okkur um.  Það var heilmikið að sjá fyrir utan það sem maður myndi kalla "heimili Hrafns" en við vorum svo heppin að rekast á Hrafn sjálfan og hann bauð okkur í sýningartúr um allt svæðið, innan og utan...... hann m.ö.o. bauð okkur, átta mann hóp, sem hann kannaðist ekki baun í bala við í skoðunarferð um heimilið sitt..... og það án nokkurs endurgjalds. 

Ég hef ferðast víða um heiminn, komin í vel yfir 60 lönd en þetta er einn af mínum uppáhalds viðkomustöðum, algjörlega upplifun á heimsvísu.  Hrafn er fæddur sögumaður og "safnið" hans inniheldur ótrúlega mikið af áhugaverðum munum af öllum stærðum og gerðum.  Og fyrir þá sem hafa áhuga á ljósmyndum þá er þetta allt saman ótrúlega myndrænt, ekki síst á góðum (og sennilega jafn flott á "mjög" slæmum) degi.  Alla vega eru allar myndirnar sem ég tók í þetta sinn alveg ótrúlega flottar....  

Heimili og nágrenni Hrafns er "safn" á heimsvísu, og hann er karakter á heimsvísu.  Eins jarðbundin manneskja og ég er..... en ég þakka innilega fyrir að við sem þjóð eigum enn svona karaktera eins og Hrafn.  Hann er kannski ekki allra en hann líka þorir að vera ekki eins og allir hinir.  Við sem þjóð hljótum loksins að vera búin að átta okkur á því hversu mikilvægt það er að eiga að slíka einstaklinga :-o 

Og í g.... b.... látum þetta ekki snúast um pólitík, við sem þjóð þurfum að eiga okkar listafólk og  ekki síst það sem oft kallast okkar "sérvitringa".  Ég held að við sem þjóð eigum eftir að "græða" heilmikið á Hrafni þegar upp er staðið, þ.e. ef við höfum "vit og þor" til þess.  Og þá er ég ekki að tala um kvikmyndirnar hans heldur þann ótrúlega ævintýraheim fyrir fullorðna sem hann er búinn að skapa þarna í Laugarnesinu. 

[Vendetta, 10.6.2010 kl. 10:36]

Ég verð að segja, Guðsteinn að þetta sem Hrafn kallar listaverk er ekkert nema drasl. Svo hefur Hrafn aðra dekkri hlið á sér, sem fæstir þekkja, en sem ég ætla ekki að koma inn á hér.

[Guðsteinn Haukur Barkarson, 10.6.2010 kl. 14:05]

AE - takk fyrir frábærann stuðning og að deila þessari sögu með okkur. Sem staðfestir að Hrafn er höfðingi heim að sækja.

Vendetta - allir hafa 'dekkri hlið' og er ekkert sem við getum gert í því. En eins og ég sagði annarsstaðar: "Beauty is in the eye of the beholder" sem þú kallar drasl er annars manns gersemi.

[DoctorE (IP-tala skráð) 10.6.2010 kl. 14:31]

Sammála Vendetta... og myndirnar hans mar, myndu fylla marga sorphauga..

[Guðsteinn Haukur Barkarson, 10.6.2010 kl. 18:03]

Dokksi - misjafn er smekkur manna.

[Óskar Arnórsson, 13.6.2010 kl. 03:47]

Ég þekki ekki Hrafn persónulega enn gamlan vin hans þekki ég. Hann talar vel um Hrafn. Það verða listamenn sem bjarga þessari veröld og Ísland ekkert undanskilið...að sjá gersemar í hverju sem er, geta bara listamenn...Jón Gnarr er listamaður númer eitt og hefur skilning á svona málum.

[Guðsteinn Haukur Barkarson, 14.6.2010 kl. 14:02]

EInmitt Óskar!

[Mofi, 15.6.2010 kl. 11:36]

Mjög forvitnilegt Haukur, takk fyrir þetta.  Ég er hjartanlega sammála þér í þessu!   Þar sem Jón Gnarr kemur úr listamanna heiminum þá trúi ég að hann hafi skilning á þessu og kunni að meta það sem Hrafn hefur þarna skapað.

[Guðsteinn Haukur Barkarson, 15.6.2010 kl. 23:27]

Sammála Dóri minn.