Tælenskar kjúklingabollur

Áfram heldur útrás mín að deila uppskriftum. Hér er ein hreint mögnuð sem ég gerði um daginn til mikillar gleði gesta og heimafólks. Þessa uppskrift má einnig nýta til kjúklingahamborga með bragði, því ferskari bollur færð þú ekki, og er þetta ólíkt öllu öðru sem maður hefur hingað til smakkað (ekki djúpsteikt og löðrandi í sósu eins og íslendingar vilja oft gera á skyndibitastöðum )!

Ég læt uppskrift af 'Sweet chilli' sósu fylgja með, slíka sósu er einstaklega auðvelt að gera, og óþarfi að kaupa rándýra tælenska sósu ef þú getur gert hana 110% ódýrari heima.

Kjúklingabollur, hráefni:
2- 3 kjúklingabringur
1 bolli af brauðmylsnu (ferskri)
4 vorlaukar
1 msk. mulið kóríander
2 tsk. sesamfræ
1 bolli ferskt kóríander (brytjað smátt)
3 msk. 'Sweet Chilli' sósu
1 - 2 msk. sítrónusafi
1 ferskt chili (fræhreinsað og brytjað smátt)
Olía til steikingar.

Aðferð:
Saxið niður kjúklingabringur niður í hakk annað hvort með hníf eða í matvinnsluvél. Best er að nota heil kóríander fræ og mylja þau niður í mortél, ef slíkt er ekki fyrir hendi þá er tilbúin mulinn kóríander ekkert verri. Setjið 2 brauðsneiðar (án skorpu) í matvinnsluvél, saxið niður mjög smátt vorlauk, ferska kóríanderinn og brytjið niður og fræhreinsið chiliíð.

Vinnið þetta vel saman í skál og bætið sítrónusafa og "Sweet chilli" sósu og hrærið vel. Gerið úr þessu litlar bollur og steikið í djúpri pönnu í olíunni. Hitið ofninn í 200° og setjið svo að lokum bollurnar inní hann í 5 mín. Stærri bollur eða ef gerðir eru hamborgarar geta tekið allt að 10 - 15 mín.

"Sweet Chilli" sósa - hráefni:
1 bolli af vatni
1 bolli af strásykri
4 - 5 chilli
1/2 hvítlauksgeiri

Aðferð:
Setjið vatn og sykur í pott og hitið þangað til vökvinn er orðinn glær. Saxið chillíið (ekki fjarlægja fræin) og hvítlauk gróft niður og bætið útí. Setjið þetta svo í matvinnsluvél og blandið vel. Sósan er tilbúinn. Ath: farið varlega þegar þetta er sett í matvinnsluvél, því sósan verður MJÖG heit.Einnig verður hún mjög sterk fyrst, en með tímanum dofnar hún.

Verði ykkur að góðu!

Athugasemdir

[Ragnheiður Arna Magnúsdóttir (IP-tala skráð) 20.2.2009 kl. 16:03]

Guðsteinn, mæli sko með því að þú opnir matarsíðu!! Maður er farin að slefa oná lyklaborðið!!

Ég elska tælenskan mat, elska hversu bragðmikill og góður hann er!! Ætla sko aldeilis að prufa þennan rétt!!!

[Guðsteinn Haukur Barkarson, 20.2.2009 kl. 16:08]

Hver veit nema ég opni matarsíðu hafði ekki hugsað útí það og finnst mér það vera góð hugmynd! Takk Ragnheiður! En þú sérð ekki eftir þessu, ég luma einnig á "Fortune cookie" uppskrift ... á ég að birta hana líka?

[Ragnheiður Arna Magnúsdóttir (IP-tala skráð) 20.2.2009 kl. 16:42]

jáhá takk !

[Valgeir Matthías Pálsson (IP-tala skráð) 20.2.2009 kl. 17:06]

Bara vatn í munninn enda 250 kg.... djókkkkkkkkkkkk

[Flower, 20.2.2009 kl. 17:26]

Þetta er allt hverju öðru girnilegra

[Rósa Aðalsteinsdóttir, 20.2.2009 kl. 18:22]

Sæll og blessaður

Svaka girnilegar uppskriftir. Svo þarft þú endilega að koma með kennslu um að matreiða hvalkjöt og uppskriftir.

Vertu Guði falinn

Kær kveðja/Rósa

[Guðsteinn Haukur Barkarson, 20.2.2009 kl. 18:22]

Ragnheiður - ég birti hana þá á morgun! Eins gerði ég í gærkvöldi apríkósu ís? Birta þá uppskrift líka?

Helga - ég mun ekki breyta frá þeirri reglu að veita andlega næringu, ég er bara svolítill dellukarl þegar kemur að eldamennsku.

Valgeir Mattías - hehehehe ... góður!

Flower - tilgangurinn helgar meðalið.

[Guðsteinn Haukur Barkarson, 20.2.2009 kl. 18:22]

Rósa - skal gert!

[Sigríður Inga Ingimarsdóttir, 20.2.2009 kl. 22:36]

Sæll Guðsteinn... mig langar að þakka þér fyrir þessar frábæru SUBWAY kökur nammi namm.... svei mér þá , þær toppa þessar upprunulegu kökur alla vega fannst börnunum mínum það

.. Eigðu góða helgi.

[Anna Benkovic Mikaelsdóttir, 21.2.2009 kl. 00:39]

jummmy...

[Ásgerður , 21.2.2009 kl. 09:06]

Kærar þakkir fyrir þetta,,ég ætla að prófa þessar bollur í kvöld. En hvað hefur þú með þessu?? Væntanlega hrísgrjón,,,en eitthvað fleira?

Kv, Ásgerður

[Guðsteinn Haukur Barkarson, 21.2.2009 kl. 13:33]

Sigríður Inga - gaman að fá svona "feedback", enda er þetta einstaklega góð uppskrift!

Anna B -

Ásgerður - það þarf ekkert með þessu, ég reyndar gerði fyrst bollurnar og síðan nokkrum dögum seinna hamborgara, með sweet chilli, tómötum og lambhagasalati, og var það gargandi snilld!

[Guðsteinn Haukur Barkarson, 21.2.2009 kl. 13:39]

Ragnheiður Arna - ég er búinn að setja inn "fortune cookies" uppskrift eins og ég lofaði.

[kiza, 21.2.2009 kl. 15:03]

Þú kemur alltaf á óvart kæri Guðsteinn Haukur :)  Þetta hljómar massíft girnilega, mun bókað mál prófa þessa strax og ég á efni á matvinnsluvélinni!

-Jóna.

[Guðsteinn Haukur Barkarson, 21.2.2009 kl. 18:45]

Glæsilegt Jóna, og takk fyrir hólið!