Gleðilega páska!

Nú þegar helgasta hátíð kristinna manna gengur í garð langar mig aðeins að staldra við og íhuga afhverju við höldum uppá þessa hátíð.

Það er vegna þess að við minnumst óeigingjörnustu fórn sem er vitað um, Jesús gaf líf sitt í sölurnar til þess að frelsa gjörvalt mannkyn. Með því að gefa líf sitt eins og lamb leitt til slátrunar, sigraði hann dauðann og opnaði um leið dyrnar að himnaríki. Jesús dó fyrir mig og þig, og minnumst þess núna yfir hátíðarnar, minnumst þess að við eigum Guð sem er lifandi og persónulegur og lifir í dag!

Guð blessi ykkur öll og gleðilega páska!

 

Hér til hægri ber að líta mynd sem ég er með uppá vegg í stofunni heima hjá mér, þetta er eftir sjálfan mig og er olíumálverk á striga.

 

Athugasemdir

[Nanna Katrín Kristjánsdóttir, 19.3.2008 kl. 14:48]

Ég er ekki sammála að þetta sé óeigingjarnasta fórn sem vitað er um.  Þetta er óeigingjörn fórn sem er mest talað um.

[Linda, 19.3.2008 kl. 14:59]

Hæ Haukur minn, var að skrifa um þessa fórn líka, er svo innilega sammála þér.

[Svanur Gísli Þorkelsson, 19.3.2008 kl. 15:37]

Ég er sammála því að Kristur dó fórnardauða. En með að segja að Kristur sé Guð gerir þú fórnardauða hans merkingarlausan. Hvaða merkingu getur hugtakið "óeigingjörn fórn" í tengslum við gjörðir hans sjálfs, haft fyrir alvaldan og alvitran Guð? Hafi Kristur verið Guð eins og þú virðist ýja að í síðustu málsgrein þinni, er hann um leið hafinn upp yfir alla þjáningu og fórn. Það gerir krossfestinguna og píslarvættisdauðann að frekar ómerkilegu sjónarspili fyrir "okkur hinar dauðlegu verur".

Ef að Kristur var aftur á móti maður innblásin af Guði sem boðið var að fórna sér til að trú hans mætti vaxa, fær píslarvættið merkingu.

Lamb sem leitt er til slátrunar hefur enga skynjun á því sem er að gerast. Jafnvel þótt það skynji að einhver hætta steðji að því, hefur það engan skilning á ástæðunum fyrir dauða sínum sem er ákvarðaður af mönnum yfirleitt.

Allt þetta lamba tal kristinna um Krist er komið úr friðþægingar og fórna hefðum gyðinga. Blóð og kjöt lambsins sem prestarnir átu með góðri list, áttu að vera friðþæging fyrir syndir þeirra. Kristnir hafa gert píslarvætti Jesús að allsherjarblóðfórn sem aftur passar ekki ef hann var raunverulega Guð.

Alvaldur Guð sem fórnar sjálfum sér getur aðeins verið að blekkja og sett á svið sjónarspil. Sá sem hlýðir Guði og deyr fyrir málstað Hans, áréttar andlegt vald Guðs og sigur yfir hinu efnislega, sem ég held að sé hinn sanni boðskapur páskanna.

[Bryndís Böðvarsdóttir, 19.3.2008 kl. 17:19]

Gyðingar trúðu ekki á eilíft líf í þeim skilningi að það væri þegar komið. Kristur sagðist vera að fara burt að búa lærisveinum sínum stað. Hann segir jafnframt:,,Hjarta yðar skelfist ekki. Trúið að Guð og trúið á mig...." (Jóh. 14:1-14).

Táknrænt sé talaði Páll um Krist sem síðustu syndafórnina er Ísraelsmenn þurftu að fórna til friðþægingar synda sinna. Hann talaði því um hann sem lamb Guðs. Jóhannes skírari sagði líka, þegar hann benti lærisveinum sínum á Jesú: ,,Sjá Guðs lamb sem ber synd heimsins".

Kristur er Guð í þeirri merkingu að Hann og Faðirinn eru eitt. Eitt eðli í þremur persónum. Þeir eru fullkomlega samhuga og því samsvara þeir hinu einu og sama eðli. Þeir eru hinsvegar þrjár aðskildar persónur.

Í Jóh.1: 1 og áfram segir: Í upphafi var Orðið, og Orðið var hjá Guði, og orðið var Guð.  Hann var í upphafi hjá Guði. Allir hlutir urðu fyrir hann og án hans varð ekkert sem til er.  Í honum varð líf og lífið varð ljós mannanna. Ljósið skín í myrkrinu en myrkrið tók ekki á móti því.

Hér sést að Kristur var í upphafi hjá Guði, enda Guð af Guði. Sonur Guðs. = Getinn af Guði, ekki skapaður af honum. Meira eins og hluti af honum með sitt aðskilda form sem birtist okkur í Jesú.  

[Bryndís Böðvarsdóttir, 19.3.2008 kl. 17:23]

Kristur er Guð í þeirri merkingu að Hann, Andinn og Faðirinn eru eitt. Eitt eðli í þremur persónum. Þeir eru fullkomlega samhuga og því samsvara þeir hinu einu og sama eðli. Þeir eru hinsvegar þrjár aðskildar persónur.

Fór víst úr kristfræðinni í þrenninguna hér. Bæti þá bara Andanum hér við til að árétta að þeir þrír eru eitt í þrenningu.  

[Bubbi J. (IP-tala skráð) 19.3.2008 kl. 18:11]

Flott mynd hjá þér og gleðilega páska

[Svanur Gísli Þorkelsson, 19.3.2008 kl. 18:26]

Kristur skýrir sjálfur út eðli fórnar í sögunni um eyri ekkjunnar. Hverju fórnar sá sem á allt, hefur allt, veit allt, getur allt, o.s.f.r.

Eina leiðin til að skilja dauða Krist að fórn eins og hann sjálfur skýrir hana, er að aðskilja hann sem persónu og einstakling frá almættinu. Almáttugur Guð getur ekki dáið.  Aðeins það sem getur dáið, getur risið upp frá dauðum. Kristur og Guð geta því ekki verið eitt og það sama jafnvel þótt þeir séu og geti vel verið "samhuga" eins og við skiljum það orð.

[Bryndís Böðvarsdóttir, 19.3.2008 kl. 18:37]

Kristur kom til jarðar og gerðist fullkominn maður, en var þó Guð af Guði. Hann gerðis maður til þess að reyna það að lifa sem maður en syndga þó ekki, Hann stóðst syndina fyrir okkur sem maður. Hann tæmdi sig öllum guðdómleika með því að taka sér bólfestu í manninum Jesú.

Jesú dó sem syndlaus maður á krossi til að taka á sig þann dóm sem syndin krafðist af mönnunum. Þetta hefði hann ekki getað í sínum guðlega mætti, þar sem að það hefði hreinlega verið svindl! Þá hefði hann auðvitað gert þetta á yfirnáttúrulegan hátt og í raun ekki þjáðst. Hann hinsvegar lifði, dó og þjáðist sem maður, en var þó upprunalega Guð af Guði og er það enn.

(Þetta kemur fram víða í Ritningunni, en ég er ekki ein af þeim sem man alltaf hvar allt stendur. Man hinsv. oft ritningarversin sjálf). 

[Bryndís Böðvarsdóttir, 19.3.2008 kl. 18:41]

Hann tæmdi sig öllum guðdómleika með því að taka sér bólfestu í manninum Jesú

Þetta sagði ég áðan, en í raun væri ekki hægt að segja beint að hann hafi tekið sér bólfestu í manninum Jesú, heldur var andi hans alltaf guðdómlegur frá upphafi og breyttist það ekki. Þetta er flókið en mikilvægt að rugla ekki með, að Jesú og Kristur séu ekki eitt og hið sama. Kristur hinsvegar svipti sig guðdómlegum mætti sínum í mennska lífi sínu hér. 

[Birna Dis Vilbertsdóttir (IP-tala skráð) 19.3.2008 kl. 19:06]

Gleðilega páska

[Guðsteinn Haukur Barkarson, 19.3.2008 kl. 19:06]

Svanur, til þess að staðfesta orð eiginkonu minnar, þá á hún við þetta vers, þegar hún talar um að Guð tæmdi sig Guðdómleikanum með því að taka sér bólfestu í manninum Jesú:

Bréf Páls til Filippímanna 2:6-8

6 Hann var í Guðs mynd. En hann fór ekki með það sem feng sinn að vera Guði líkur. 7 Hann svipti sig öllu, tók á sig þjóns mynd og varð mönnum líkur. 8 Hann kom fram sem maður, lægði sjálfan sig og varð hlýðinn allt til dauða, já, dauðans á krossi.

 

[Úlfar Þór Birgisson Aspar, 19.3.2008 kl. 23:19]

Gleðilega páska Guðsteinn til þín og þinna.

[Fjóla Æ., 19.3.2008 kl. 23:21]

Óska þér og þínum gleðilegra páska og hafðu það gott.

[Sigurður Þórðarson, 20.3.2008 kl. 00:26]

Takk fyrir samveruna og vinnuna í Fjölskylduhjálpinni.  Með starfi þínu lagðir þú fram skerf til þess að fátækt fólk gæti átt gleðilega páska.

[Svanur Gísli Þorkelsson, 20.3.2008 kl. 01:39]

 Kæra Bryndís og Guðsteinn.

Gleðilega páska og þakka ykkur viðleitni ykkar til að skýra mál ykkar.

Ef við athugum betur hvað felst í orðinu "líkur" í þessu samhengi komumst við að því að eina leiðin fyrir alla menn til að nálgast Guð er að vera honum líkur. Þeir geta ekki orðið Guð né geta þeir nálgast hann í efnislegri merkingu því efnið er fyrir Guði hjómið eitt.  Kristur var "líkur" Guði samkvæmt þessum texta sem vitnað er í, en ekki Guð.  Né var hann hluti af Guði heldur sköpun hans.  Hann sem boðberi Guðs er leiðin til Guðs og að fylgja boðskap hans var eina leiðin fyrir okkur til að líkjast Guði.

Að halda því fram að Kristur hafi verið Guð er eins og að halda því fram að bolli af sjó sé úthafið allt. Hann var af Guði en ekki Guð sjálfur. Ekkert í ritningunni gefur annað í skin og allt annað er túlkun sem ekki fær staðist neina skoðun í ljósi þess sem ritað er né almennrar skynsemi.

Að Guð geti tæmt sig Guðdómleikanum er að segja að Guð geti gert sig að engu. Hann sem er allt getur ekki orðið að engu. Slíkt er einfaldlega mótsögn. Tvö absalút fyrirbæri af sömu tegund geta ekki verið til í sama alheimi samímis. Hið sama getur ekki verið allt og ekkert samtímis, alla vega ekki í mannlegum huga. Og 

[Rósa Aðalsteinsdóttir, 20.3.2008 kl. 02:13]

Sæll Guðsteinn litli bróðir minn og trúbróðir.

,,Sjá, Guðs lamb, sem ber synd heimsins. Jóh. 1. 29.a.

 "Hann afmáði skuldabréfið, sem þjakaði oss með ákvæðum sínum. Hann tók það burt með því að negla það á krossinn." Kól. 2: 14.

Viðbót við síðustu færslu: Fann ekki versið í dag en Helga vinkona okkar hjálpaði mér og nú sendi ég þér hressilegt orð þótt seint sé. "Betra seint en aldrei."

"Því að ég þekki þær fyrirætlanir, sem ég hefi í hyggju með yður -segir Drottinn - fyrirætlanir til heilla, en ekki til óhamingju, að veita yður vonarríka framtíð. Þá munuð þér ákalla mig og fara og biðja til mín, og ég mun bænheyra yður. Og þér munuð leita mín og finna mig. Þegar þér leitið mín af öllu hjarta, vil ég láta yður finna mig - segir Drottinn - og snúa við högum yðar og safna yður saman frá öllum þjóðum og úr öllum þeim stöðum, þangað sem ég hefi rekið yður - segir Drottinn - og flytja yður aftur á þann stað, þaðan sem ég herleiddi yður." Jeremía 29: 11.-14.

Guð blessi þig, Bryndísi og börnin.

Shalom. Rósa

[Rósa Aðalsteinsdóttir, 20.3.2008 kl. 02:20]

Christian Glitter by www.christianglitter.com

Sæll Guðsteinn minn
Gleymdi að skrifa að málverkið sem þú málaðir er meiriháttar flott.
Guð blessi ykkur.
Kær kveðja/Rósa

[DoctorE (IP-tala skráð) 20.3.2008 kl. 14:36]

Að fórna mannslífi segir þú, hvenær er slíkt ásættanlegt, síðan hvenær er slík hegðun eitthvað annað en villimennska.
Það var engum fórnað fyrir mig takk fyrir.

[Gunnar Helgi Eysteinsson, 23.3.2008 kl. 00:05]

Glæsilegt málverk og Gleðilega Páska, kæri bloggvinur.

[Sigurður Þórðarson, 23.3.2008 kl. 14:09]

Kæri bloggvinur, ég óska þér og þinum gleðilegra páska.